“මගේ අම්මේ…. මගේ හුස්ම නවතින්න නම් ඔබේ තුරුල්ල ඕනෑකර තිබේ…” නික්ම ගිය ඇය වෙනුවෙන් ආදරණීය පුතු කලකට පෙර ලියූ සටහනක් මෙන්න..

ඔහුට මතක ඇති කාලයක පටන් ඔහුගේ ලෝකයට ඉරත්, හඳත් වුණේ ඔහුගේ ආදරණීය මෑණියන් කියන එක අමුතුවෙන් කියන්න ඕන නැහැ..

ඉතින් ඇගේ නික්මයාමත් එක්ක පූර්ණගේ ලෝකය මොන තරම නම් පාළු වෙලා ඇතිද..? මේ කියන්නේ අන්න ඒ ගැන ඇසෙන තවත් එක් සංවේදී කතාවක්.. ඇය ප්‍රවිණ මාධ්‍යවේදියෙකුට සවියක් වුණු බිරිඳක්…

ප්‍රවීණ මාධ්‍යවේදී ප්‍රේමකීර්ති ද අල්විස්ගේ භාර්යාව වන ප්‍රවීණ ගේය පද රචිකා නිර්මලා ද අල්විස් මහත්මිය ඊයේ (22) රාත්‍රියේ අභාවප්‍රාප්ත වී තිබෙනවා..

ඇයගේ පුත් පූර්ණ ප්‍රේමකීර්තී ද අල්විස් සිය ෆේස්බුක් ගිණුමේ සටහනක් තබමින් මේ පිළිබඳ දැනුම් දී තිබුණ අතර, ඔහු තම මව වෙනුවෙන් මිට කාලෙකට කලින් ලියූ සටහනක් මෙලෙස උපුටා දක්වන්න්ට හිතුවේ පූර්ණ මොන තරම් නම් ඇයට සමීපද යන්න නැවත වරක් සිහිපත් කිරීමටයි..

“ගෙදර තියෙන ලොකුම පින්තූරේ මේක.

මම එක්ක වලි දාගන්න ලොකුම කෙනා මගෙ අම්මා.

ඒත් පුංචි කාලෙ ඉදන් අදටත් මගේ අම්මගෙ කම්මුල කියන්නෙ, මට අදටත් හුස්ම ගන්න පුලුවන් තැන.

මගේ අම්මේ…. මගේ හුස්ම නවතින්න නම් ඔබේ තුරුල්ල ඕනෑකර තිබේ…”

එසේම ඇගේ නික්මයාම ගැන මෙන්න මේ වගේ සංවේදී සටහනක් දයාන් විතාරණ මහතාද ඡායාරූප පෙළක් එක්කම ඔහුගේ මුහුණුපොතේ පළකර තිබුණා..

“ප්‍රේමයේ කීර්තිය සොයා ගිය ආදරණීය නිර්මලා අක්කා අභාවප්‍රාප්ත වෙයි ………………………………

අසහාය ගේය ප්‍රබන්ධක මෙන්ම මාධ්‍යවේදී අභාවප්‍රාප්ත ප්‍රේමකීර්ති ද අල්විසුන්ගේ බිරිඳ වන නිර්මලා ද අල්විස් ඊයේ දින අභාවප්‍රාප්ත වූ අතර මියැදෙන විට ඇය 70 වන වියෙහි පසුවිය.

අප ‘ඔස්කා’ සංවිධානයේ ද සාමාජිකාවක වූ ඇය තම සැමියා පිළිබඳ ලියූ “ප්‍රේමකීර්තිනී” නම් කෘතිය බොහෝ දෙනාගේ සම්භාවනාවට ලක් වූ බව නොරහසකි. කලාවට සාහිත්‍යයට සිනමාවට ආදී බොහෝ ක්ෂේත්‍රයන් කෙරෙහි නිබඳව සිය ආදරණීය හැඟීම් ප්‍රකට කළ ඇය, ප්‍රවීණ සන්නිවේදක පූර්ණ සම්පත් ද අල්විස්ගේ ආදර මෑණියන් ය.

නිර්මලා අක්කාගේ මෙන්ම ඇගේ පුතු පූර්ණ ද ඔහු “හපන් පැදුරේ” ගී ගයන කුඩා කළ සිට ම මා ඡායාරූප ගෙන ඇති අතර ඉකුත් 2019 වසරේ දී නැවත ඔවුන් දෙදෙනාගෙ ම නව ඡායාරූප කිහිපයක් ගැනීමට ද මා සමත් වුණි.

සර්වකාලීන ගෞරවයට පාත්‍ර වන යුග පුරුෂයෙකුට බිරිඳක් වූ ඇය, අවසන් වරට මට මුණගැසුණේ ගුවන්විදුලි සංස්ථාවේ දී මුණගැසුණු අතර එදින ගත් ඡායාරූ මවිසින් ගන්නා ඇගේ අවසන් මතක රූ එකතුව වේවි යැයි සිහිනෙන් හෝ නොසිතුවෙමි.

තරමක කලක් දැඩි සේ ගිලන්ව රෝහල්ගතව සිට ප්‍රතිකාර ලත් ඇය පිළිබඳව පූර්ණ නිබඳව මුහුණුපොත ඔස්සේ ද අප දැනුවත් කළ සේම, සිය මෑණියන් අසලින්ම රැඳෙමින් පූර්ණ මෙම කාලය ගෙවූ අයුරු ද අප හොඳින් දුටුවෙමු. එනිසා අන් කවරදාටත් වඩා මේ මොහොත පූර්ණට දැනෙන්නේ කෙලෙසින්දැයි මම හොඳින් දන්නෙමි.

ඇගේ නිසල දේහය අවසන් ගෞරව දැක්වීම සඳහා පිළිමතලාව ෆොන්සේකා අවමංගල ශාලාවේ තැන්පත් කෙරෙන අතර, දේහය පිළිබඳ අවසන් කටයුතු ආගමික වතාවත්වලින් පසු 23 වන දින පස්වරු 5’ට සිදු කිරීමට නියමිත ය.

ආදරණීය පූර්ණ ඇතුළු පවුලේ සැමට මගේ සාතිශය සංවේගය දන්වන සේ”