පසුගිය අ.පො.ස. සාමාන්‍ය පෙළ විභාගය ආරම්භ වන විට මාතර ශාන්ත තෝමස් උසස් බාලිකා විද්‍යාලයේ අමායා සස්මිණි දියණිය සිටියේ රෝහලේ සයනයක් මතය. දෛවයේ කුරිරු සරදමකට ලක්ව සිටි අමායා තම ජීවිතය පිළිබඳ ආශාවන් අතහැර ජීවිතයත් මරණයත් අතර සැරිසරමින් වේදනාත්මක දින ගණනක් ගත කරමින් සිටියේ පවුලේ සියලුදෙනා මෙන්ම පාසලේ ගුරු මවුපියන් හා සිය මවුපියන්ගේ ද නෙතඟ කඳුළු රඳවමිනි.
නාකුළුගමුව බටහිර, හඳපාන්ගොඩැල්ල, “සොඳුරු සෙවණ” නිවසේ කුඩා කල මහත් ආසාවෙන් කෙළිදෙළෙන් ගත කළ අමායා නව යෞවනියක් බවට පත්වන විට ඇයගේ දිවි මඟ සොඳුරු නොවූවා ය. දික්වැල්ල උතුර මහා විද්‍යාලයෙන් ප්‍රාථමික අධ්‍යාපනය ලබන අමායා සස්මිණි ශිෂ්‍යත්ව විභාගයෙන් උසස් ලෙස සමත්ව ගමේ පාසලෙන් මාතර නගරයේ ශාන්ත තෝමස් උසස් බාලිකා විද්‍යාලය වෙත ඇතුළුවන්නේ තම අනාගතය පිළිබඳ දහසක් බලාපොරොත්තු සමඟය.
එහෙත්, පාසල තුළ විවිධ දක්ෂතා පෙන්වන අමායා වසරින් වසර ගතවෙමින් 10 ශ්‍රේණියට සමත් වන්නේ තමන් මුහුණ දෙන පළමු කඩඉම් විභාගය වන සාමාන්‍ය පෙළ විභාගයෙන් උසස් සමාර්ථයක් ලබා ගැනීමේ මහත් බලාපොරොත්තු ඇතිව ය.
ඇයගේ බලාපොරොත්තු ඉටුකර ගැනීම වෙනුවෙන් මවුපියන් හා ගුරු භවතුන් අමායාට සියලු සහයෝගයන් ලබා දෙනු ලබන්නේ ඈ තුළ තිබූ ඉලක්කගත ප්‍රතිඵලය ලබා ගත හැකි බවට පෙරනිමිති පෙන්වමින් සිටි නිසයි.
ඒ අතර තම සියලු බලාපොරොත්තුවලට කණකොකා හඬවමින් හිටිහැටියේ අමායාට සුව කළ නොහැකි රෝගී තත්ත්වයක් ඇතිවූයේ නොසිතූ මොහොතක ය.
වහා වෛද්‍ය ප්‍රතිකාර සඳහා අමායා රැගෙන යන මවුපියන් වෛද්‍ය උපදෙස් මත දිගුකාලීන ප්‍රතිකාර සඳහා ඇය යොමු කරනු ලැබුවේ අනාගත බලාපොරොත්තු බිඳක් හෝ තබා ගනිමිනි. තම රෝගී තත්ත්වය නිසා කොතරම් මානසික පීඩාවක් ඇති වුවද ප්‍රතිකාර ලබමින් ම පාසල් ගමන අත් නොහළ අමායා තම ඉලක්කගත සාමාන්‍ය පෙළ විභාගයට මුහුණදීමට සූදානම් වූවාය. ඒ අතර 11 ශ්‍රේණියේ අවසන් මාස කිහිපය තුළ ඇයට වැඩි කලක් ගත කරන්නට සිදුවූයේ රෝගී තත්ත්වය මත ඇඳක් මතය.
කොතරම් වේදනා බර තත්ත්වයක් වුවද ඇය රෝගී ඇඳේ සිටද පාඩම් කළාය. සාමාන්‍ය පෙළ විභාගය ආරම්භක දිනය වන විට ඇය දැඩි සේ රෝගාතුර වී විභාගයට පෙනී නොසිටීමට තීරණය කරන්නට තරම් සිත් පහළ වී තිබිණි.
කොතරම් රෝගී තත්ත්වය තිබුණද ඇයගේ හීන සැබෑ කර ගැනීමත්, මවුපියන්ගේ බලාපොරොත්තු හැබෑ කිරීම මෙන්ම පාසලේ ගෞරවය රැකදීමත් වෙනුවෙන් අමායා අමාරුවෙන් හෝ විභාගයට පෙනී සිටීමට තීරණය කළේ නිතර ඇතිවන වමනය තත්ත්වයද අමතක කරමිනි.
“අමායා හරිම හොඳ දරුවෙක්, එයා හොඳින් ඉන්න කාලේ ඉස්කෝලෙ වැඩ හරිම හොඳට කළා. ගුරුවරුන්ට හරි කීකරුයි. වැඩට හරිම දක්ෂයි. මේ දරුවා විභාගයට ආවේ වමනය කරමින්. මට ඒ ගැන මතක් වෙනකොටත් දරාගන්න බැහැ. අනේ මේ රත්තරං කෙල්ල පාසලේ ගෞරවය රැකලා දීලා අද අප අතරින් යන්නම ගිහිල්ලා. කොහොම හිත හදාගන්නද?”
මාතර සාන්ත තෝමස් උසස් බාලිකා විද්‍යාලයේ නියෝජ්‍ය විදුහල්පතිනි ලලනී කුමාරි මහත්මිය පැවසූයේ නෙතින් කඩා හැලෙන කඳුළු දෑතින් පිස දමමිනි.
අමායා සස්මිණි අමාරුවෙන් විභාගයට පෙනී සිට රෝහල්ගතව සිටියදී සාමාන්‍ය පෙළ ප්‍රතිඵල නිකුත් වූයේ ඇයගේ ප්‍රතිඵලය අසන දකින සියලුම දෙනාගේ නෙතට කඳුළු එක්කරමිනි. ඒ අර තරම් අපහසුවෙන් වේදනාවෙන් සිටි අමායා සාමාන්‍ය පෙළ විභාගයෙන් A සාමාර්ථ 9 ක් ම ලබාගෙන විශිෂ්ට ලෙස සමත්ව සිටීම නිසයි.
සාමාන්‍ය පෙළ විභාගයෙන් ඉහළ සාමාර්ථයක් ලබා ගත්තද අමායා සස්මිණි උසස් පෙළ පන්තියකට එකතු වෙන්නටත් පෙර ඉකුත්දින ජීවිතයට සමුදී මෙලොවෙන් වෙන්ව ගියේ අසන දකින සැමගේ නෙතු කඳුළින් පුරවා දමමිනි.
ශාන්ත තෝමස් උසස් බාලිකා විද්‍යාලයේ විදුහල්පති ප්‍රමුඛ ගුරු භවතුන් සියලු දෙනා අමායා ගැන ලොකු බලාපොරොත්තුවක් තිබුණද හදිසියේ හටගත් මෙම අසනීප තත්ත්වය ඒ බලාපොරොත්තු සියල්ලම බිඳදැමීමට තරම් හේතුවක් වී තිබිණි. එහෙත් සාමාන්‍ය පෙළ විභාගයේ ප්‍රතිඵලත් සමඟ අමායා අවසන් මොහොතේ ශාන්ත තෝමස් උසස් බාලිකාවට මාතොට කිරුළ පැලඳවීමට සමත්ව සිටියේ, සියලු විෂයයන්ට A සාමාර්ථ නවයක් ලබා ගැනීම හේතුවෙන් උසස් බාලිකා විද්‍යාලය සාමාන්‍ය පෙළ විභාගයෙන් දිස්ත්‍රික්කයෙන් සියයට 100% ක් සමත් විද්‍යාලය පත්වීම නිසයි. අමායා සස්මිණි මෙලොව හැර ගොස් අවසන් කටයුතු සිදුවන අවස්ථාවට විදේශ ගතව සිටින පියාට එන්නට නොහැකි වීම පවුලේ සියල්ලන්ගේ සිතෙහි දුක වැඩි කරන්නට හේතු වී තිබුණි. අමායාගේ මවත් එකම නංගිත් අමායාගේ දේහය අසලට වී දුක් අඳෝනා කියවමින් හඬා වැටෙන්නේ යළි කිසිදු දිනක අමායා තම පවුල සමඟ එක්ව නොසිටින බව පවසමිනි.
ඊයේ (04) සවස මළ හිරු බැස යද්දී අමායා සියලු දෙනා අතහැර මෙලොවින් යන්න ගියේ එක්ව සිටි සිය ගණනකගේ නෙතඟින් කඳුළු රූරා වැටෙද්දී ය.
(ගන්දර – ජයසිරි පේදුරුආරච්චි)
Source – Gossip Lanka News
Post a Comment