සුදු පාට ඇඳුම් හරිම ලස්සනයි. ඒ වුණාට අපි සුදුපාට ඇඳුම් ගන්නෙ ඉතාම අඩුවෙන්, මොකද පරිස්සම් කරගෙන දිග කාලයක් සුදු ඇඳුමක් අඳින එක ලේසි වැඩක් නෙවෙයි. කන කෑමක් බීමක් හරි, ඉඳඟන්න තැනක තියෙන පොඩි දෙයක් හරි ගෑවුණු ගමන්, ඇඳුම සවුත්තු වෙලා යනවා. ඒ වගේ පැල්ලමක් යවන එක ලේසි නැති නිසා ඇඳුමක් ආය අඳින්න වෙන්නේ නෑ. මේ වගේ තත්වයන් වලට විසඳුම් තියෙනවා, අපි ගොඩක් දෙනෙක් දන්නේ නැති. ඒ වගේම ඇඳුම් වල පෙනුමත් කල් පැවැත්මත් වැඩි කරගන්න පුලුවන් තවත් ක්‍රම ගොඩක් තියෙනවා.
සුදු ඇඳුමක පැල්ලමක් දැක්ක ගමන් ඒක අරන් ලොන්ඩ්‍රි එකට දුවන්න ඕනැ නෑ, ගෙදරදීම පැල්ලම් යවන්න පුලුවන්, ඇඳුම් වල දීප්තියත් ලස්සනත් වැඩි කරගන්න පුලුවන් ක්‍රම කිහිපයක් ගැන අපි අද ඔබට කියලා දෙන්නයි යන්නේ.
01. ඉවත් කරන්න අමාරු පැල්ලම් ඉවත් කරගන්න
ජලය ලීටර් දෙකක් විශාල භාජනයකට වත් කර එය උටුරන තුරු නටවා ගන්න. එයට ලොකු දෙහි ගෙඩි තුනක යුෂ මිශ්‍ර කරගන්න. එයටම ලුණු තේ හැන්දක් ද සේදුම් දියරද කෝප්ප 1/4ක් එක් කරගන්න. පැල්ලම් සහිත ඇඳුම් එයට දමා පැය හතරක් පමණ පෙඟෙන්නට හරින්න. ඉන්පසු පිරිසිදු ජලයෙන් තෙවරක් පමණ සෝදා ගන්න. මෙය ඇඳුම් වල අත් වල ඇති කහට පැල්ලම් වලටද ඉතා හොඳ පිළියමකි.
02. සුදු ෂර්ට් එක තවත් සුදු කරගන්න
පැල්ලම් සහිත ඇඳුමක පැල්ලම් ඉවත් කිරීමට බේකින් සෝඩා මේස හැන්දක් කෙලින්ම පැල්ලම මතට දමන්න. ඉන්පසුව දෙහි හෝ ලෙමන් ගෙඩියක් දෙකට කපා එයින් හොඳින් බේකින් සෝඩා ඇඳුම මත තවරවා ගන්න. විනාඩි 15ක් පමණ තිබෙන්නට හැර මද උණුසුම් ජලයෙන් සෝදා හරින්න.
මෙම ක්‍රමය සාමාන්‍යෙන් භාවිතා කරන්නේ සුදු ඇඳුම් වල අත් යට ඇති කහ පාට පැල්ලම් මැකීම සඳහා වැඩිපුරම භාවිතා වෙනවා. ඔබට අවශ්‍ය නම් බේකින් සෝඩා සහ ලෙමන් වලින් පේස්ට් එකක් සාදාගෙන එය අවශ්‍ය තැන් වලට යොදා ගන්න.
03. විරංජනය
ලෙමන් ගෙඩි 2ක් කපා ගන්න. උණු කරගත් ජලය ලීටර් දෙකකට මෙම යුෂ එක් කරගන්න. ඔබේ සුදු ඇඳුම් මෙහි දමා විනාඩි 40ක් පමණ පොඟවා ගන්න. ෛන් පසු වෙනදා විදියටම වොෂින් මැෂින් එකේ හෝ අතින් සෝදා ගන්න.
04. සිනිඳු ඇඳුම් සෝදන්න
සාමාන්‍ය ඩිටර්ජන්ට් පවුඩර් කෝප්ප 1/4ක් සහ හයිඩ්‍රජන් පෙරොක්සයිඩ් කෝප්ප 1/4 ජලය කොටස් දෙකකට එක් කරගන්න. මෙහි විනාඩි 30ක් පමණ රෙදි පෙඟෙන්නට හැර ඉන් පසු සෝදාගන්න.
ඔබේ සිනිඳු ඇඳුම් වඩාත් ප්‍රවේශමෙන් සෝදා ගැනීමට ඔබ යොදාගන්න ඩිටර්ජන්ට් වර්ගය ගැන සැළකිලිමත් වෙන්න. මේ ක්‍රමය වූල්, ලොම් ආදී සිනිඳු ඇඳුම් සේදීමට වඩාත් හොඳයි.
05. තදබල සේදීමකට
හයිඩ්‍රජන් පෙරොක්සයිඩ් 1/4 කෝප්පයක් සහ ඇමෝනියා බින්දු 4 ක් වතුර කොටස් හතරකට එක් කරන්න. ඔබේ ඇඳුම් මෙම මිශ්‍රණය තුළ විනාඩි 10 ක් පොඟවා ගන්න. ඉන්පසු හොඳින් සෝදන්න.
මෙම විසඳුම අනෙක් ඒවාට වඩා ඵලදායි නමුත් තරමක් සැර වැඩියි. ඒ නිසා අත්වැසුම් පැළඳීමට අමතක නොකරන්න.
06. ස්වාභාවික රෙදි මෘදුකාරකයක්
ඔබේ ඇඳුම් විනාඩි 40 ක් උණුසුම් ජලය කොටස් 1 ක් සහ විනාකිරි කෝප්ප 1/2 ( අවුන්ස 4) එක් කොට සාදාගත් ද්‍රාවණයක පොඟවා ගන්න. ඔබට දහඩිය පැල්ලම් ඉවත් කිරීමට අවශ්‍ය නම්, පැල්ලම් සහිත ප්‍රදේශයට විනාකිරි වත්කර සබන් කැබැල්ලක් එයට උඩින් අතුල්ලන්න.
විනාකිරි ඇඳුම් සුදු කිරීම පමණක් නොව ස්වාභාවික රෙදි මෘදුකාරකයක් ලෙසද ක්‍රියා කරයි.
07. ලිනන් රෙදි සේදීමට
ලිනන් ඇඳ රෙදි සහ වෙනත් ඇඳුම් සේදීමට, ඇඹුල් කිරි බාල්දියකට දමා රෙදි පැය 1-2 ක් පොඟවා ගන්න. ඉන්පසු සුපුරුදු පරිදි සෝදන්න. අවශ්‍ය නම් පොඟවා ගැනීම නැවත කළ හැකිය.
08. රුධිර පැල්ලම් ඉවත් කිරීමට
රුධිර පැල්ලම් පහසුවෙන් රෙදි වලින් ඉවත් වෙන්නේ නැහැ. සීතල ජලයට ලුණු මිශ්‍ර කොට රුධිර පැල්ලම් සහිත ඇඳුම දමා පැයක් පොඟවා සාමාන්‍ය පරිදි සෝදාගන්න.
09. ග්‍රීස් හෝ හොඳි පැල්ලම් මැකීමට
ඇඳුම් වල ඇතිවෙන ග්‍රීස් පැල්ලම් නිතර ඇති වෙන්න පුලුවන් වගේම ඉවත් කරන්න හරිම අපහසුයි. පැල්ලම ඇතිවූ ගමන්ම දුටුවොත් හැකි ඉක්මණට පැල්ලම මතට ලුණු ස්වල්පයක් දමා සුළු වේලාවක් තිබෙන්නට හැර සෝදන්න.
පැල්ලම ඇතිවී දිගු වෙලාවක් ගත වී ඇත්නම්, කෙලින්ම ඒ මතට විනාකිරි යොදන්න.
10. ඉටි කිරි පැල්ලම් ඉවත් කිරීමට
මුලින්ම ඉටි පැල්ලම මත අයිස් කැටයක් තබන්න. එයින් එය හොඳින් ඝන වෙනවා. ඉන්පසු මුවහත අඩු පිහියක් වැනි දෙයකින් සූරා හැකිතාක් ඉවත් කරගන්න. ඉන් පසු ඇඳුමේ පැල්ලම ට යටින් හා උඩින් කඩදාසි කැබලි තබා අයන් කරගන්න. අයන් එකේ උණුසුමට ඉටි දියවී කඩදාසි වල ඇලෙනවා.
(උපුටාගැනීම රැජිණිය වෙබ් අඩවිය)
Post a Comment