වාස්තු විද්‍යානුකූලව නිවෙසක් ඉදි කිරීමට ප්‍රථම භූමිය තෝරා ගැනීම ප්‍රධාන අවශ්‍යතාවක් වන බව අප දන්නා කරුණකි.
එම නිසා වර්තමානයේ මෙන් නොව පුරාතනයේ භූමිය තෝරා ගැනීමේදී භූමියේ පස්වල ස්වභාවය, බහිරව දෝෂ, දේවතා දෝෂ ආදී කරුණු රාශියක් ගැනම විවිධ ක්‍රමවේදයන් අනුගමනය කරමින් විමර්ශනයට ලක්කර භූමියේ විස සහිත බව සහ ඉන් නිකුත් වන විස වායුු ගැන නිවැරැදි අධ්‍යයනයක් සිදු කර නිවෙසක් ඉදි කිරීමට අවශ්‍ය භූමිය තෝරා ගත් බව පෙනේ. ඒ අනුව නිවැසියන්ට ප්‍රශස්ත ජීවිතයක් ගත කිරීමට අවශ්‍ය මූලික පරිසරය නිර්මාණය කෙරිණ.
මේ සම්බන්ධව වාස්තු මූල ග්‍රන්ථයන්ද සාක්ෂි දරන අතර එසේම යම් හෙයකින් පිපිරීම්, පැළීම් සහිත බිම්, ශල්‍ය ඇති බිම්, තුඹස් සහිත බිම්, පහත් වීම්, උස් වීම් පවත්නා විෂම බිම් ආදී භූමි ෙදා්ෂ සහිත භූමියේ විසීමෙන් ඇති වන ප්‍රතිවිපාකයන්ද පැහැදිලිව දක්වා තිබේ. ඒ අනුව භූමි දෝෂ සහිත භූමියක විසීමෙන් ධන හානි, සිත් තැවුල්, මානසික විකෘතිතා, විෂම රෝග ආදී තත්ත්වයන්ට මුහුණ පෑමට සිදුවන බවද සඳහන් වේ. නමුත් වර්තමානයේ නිවාස ඉදි කිරීමට සුදුසු ඉඩම්වල සීමිතභාවය නිසාත් අලංකාරයට පමණක් මුල්තැන දෙන නිවාස ඉදිකිරීම් රැල්ලක් ව්‍යාප්ත වීමට පටන් ගෙන නිසාත් පොදු මූලික අවශ්‍යතාවට ප්‍රමුඛත්වය ලබාදීම නිසාත් භූමි පරීක්ෂාව අභාවයට යමින් පවතින බවද අපට පැහැදිලිය.
අප ජීවත්වන පෘථිවිය අවුරුදු මිලියන ගණනකට පෙර මහා පිපිරුම නමින් හැඳින්වෙන විශාල පිපිරීමක් නිසා නිර්මාණය වූවක් බව අනුමාන මතය වේ. එබැවින් පෘථිවි අභ්‍යන්තරය ඒකාකාරී නොවන බව අපට පැහැදිලිය. එම නිසා මෙම විෂමකාරී පෘථිවි අභ්‍යන්තරයේ නොයෙක් ආකාරයේ භූගත ප්‍රතික්‍රියාවන් සිදුවේ. මෙම ප්‍රතික්‍රියාවන්වල ප්‍රතිඵලයන් ලෙස ඇතිවෙන්නා වූ අහිතකර ශක්ති කිරණ පොළව මතුපිටින් නිර්ගමනය වේ. නූතන භූ විද්‍යා පරික්ෂණයන්ගෙන් පවා සනාථ වූ මෙසේ පොළොව මතුපිට ආවරණය කරන අහිතකර විකිරණ ශක්ති රේඛා (හාට්මන් ජාලා, කරි ජාලා ආදී) ජාලයක් ලෙස ක්‍රියාත්මක වේ.
එම නිසා මෙම අමිහිරි ආවරණයන් සියලුම ජීවීන්ට බලපාන බව අමුතුවෙන් කිව යුතු නොවේ. මිනිසාගේ ප්‍රතිශක්තිකරණ පද්ධතිය දුර්වල කර නිරෝගී බවට හානි පමුණුවන සාම්ප්‍රදායක වාස්තු ශාස්ත්‍රයේ භූමි දෝෂ නම් විය හැකි තත්ත්වය භූ ව්‍යාධි ලෙස පැහැදිලි කර ගත හැකිය. භූ ව්‍යාධි තත්ත්වයන් පෘථිවිය හරහා නැඟී එන ස්වාභාවික විකිරණ හේතුවෙන් මෙන්ම භූගතව ගලා යන ජලය සහ පොළොවේ තැනින් තැන පවත්නා විශේෂ ගුරුත්ව බලයක් සහිත ෆොසිලවල බලපෑමද අපට තදින් බලපාන බව කිව යුතුයි. පරිසරයේ ඇති මේ ව්‍යාධි තත්ත්වය සතුන්ට මෙන්ම ළදරුවන්ටද ඉතා හොඳින් දැනෙන අතර විවිධ ගහකොළ විකෘති වීම් බොහොමයකට මේවායෙන් ඇතිකරන බලපෑම සරල නිරීක්ෂණයකින් හඳුනාගත හැකිය.
ස්වාභාවිකවම සෘජුව ඉහළට වැඩී යන පොල් ගසක කඳ වටා සර්පිලාකාර ආකාරයට වැඩී යන්නේ නම් නිසැකව පොල් ගසට යටින් ඉතා ආසන්න පිහිටීමක සුවිශේෂ භූ ව්‍යාධි තත්ත්වයක් සැලකිය යුතුය. එසේම ඕනෑම ගසක විකෘති ආකාරයේ අස්වාභාවික තත්ත්වයන් පැවතීම මෙන්ම පුස් ගෙඩි නිරන්තරයෙන් හට ගන්නා ශාකයන් පිහිටි ස්ථානයන්ද, පල හට නොගන්නා ශාකයන් ඇති ස්ථානයන්ද මෙවැනි භූ ව්‍යාධි තත්ත්වයන්ට ගොදුරු පරිසරයන්ය. මෙවැනි ස්ථානයක නිවසක් ඉදිකිරීමෙන් පසු භාවිතයේදී නිදන ඇඳ පිහිටුවා ගැනීමේදී විශේෂයෙන් සැලකිලිමත් විය යුතුය.
එයට හේතුව අපගේ දෛනික චර්යාවන්ගේ වැඩි කාලයක් එක් තැනක රැඳෙමින් සිටින කටයුත්ත නිදා ගැනීම බැවිනි. භූ ව්‍යාධියට ගොදුරු වූ ස්ථානයක නිදන ඇඳ පිහිටුවා ගැනීමෙන් භූ ව්‍යාධි ජාලයන්ට නිරන්තරයෙන් නිරාවරණය වීම වැලක්විය නොහැකිය. මෙසේ නිරන්තරයෙන් එවැනි භූ ව්‍යාධි ජාලයන්ට නිරාවරණය වීම හෘදයාබාධ, පිළිකා ආදී රෝග ගණනාවක් වැලඳීමට හේතුවක් වන බවද පර්යේෂණ මඟින් සනාථ කර ඇත. එම නිසා මේ පිළිබඳව අප වඩාත් සැලකිල්ලක් දැක්විය යුතුය. එසේම මෙවැනි භූ ව්‍යාධි තත්ත්වයන් අපගේ අත්දැකීම අනුව නම් ඉතා තදින් කොඳු ඇට පෙළට බලපාන බවද කිව යුතුය.
එසේම පොළොව අභ්‍යන්තරයේ ඇති භූගත ජලයද එක්තරා භූ ව්‍යාධි තත්ත්වයන්ට හේතුවන බවද සොයාගෙන තිබේ. මෙම ජල මාර්ග පාෂාණ සහ භූ ස්තර හරහා ගමන් කිරීමේදී ඇතිවෙන ඝර්ෂණ බලය පොළොව අභ්‍යන්තරයේ විද්‍යුත් ක්ෂේත්‍රයක් ඇති කරන බවත් පොළවේ ස්වාභාවික කාන්දම් ක්ෂේත්‍රය හා ගැටීමෙන් හානිකර විකිරණ ශක්තීන් ජනනය වී පොළවේ යම් ස්ථානවලින් නිකුත්වන බවත් සැලකේ. මෙවැනි ජල නහරවල හානිකර ආවරණයන්ට ගොදුරු වූ විට අපගේ අස්ථි පද්ධතියට මූලික බලපෑම් ඇතිවේ. උදෑසන වෙහෙසකාරී වීම, නින්ද නොයෑම, හිසරදය, සන්ධි වේදනා, පිළිකා, ලියුකේමියාව, පෙණහලු, වකුගඩු, අක්මාව, ආමාශය හා ආහාර ජීර්ණ පද්ධතිය සම්බන්ධ ආබාධ ආදී පෙර නිමිති මෙවැනි ව්‍යසනයන්ට ගොදුරු බව කියාපායි.
මෙකී ව්‍යාධි තත්ත්ව විශ්ලේෂණය සඳහා විවිධ සුව කිරීමේ නියැළෙන පුද්ගලයකුට සංවේදී දෑතක් තිබීම ප්‍රමාණවත් අතර එසේ වුවත් එවැන්නක් විශ්වාස නොකරන්නකුට බටහිර විද්‍යාත්මක මෙවලම් ඇසුරින්ද විශ්ලේෂණය කළ හැකිවේ. ලිචර් ඇන්ටනාවද මෙවැනි මෙවලමක් වන අතර ඊට පෙර භාවිත කළ සරල අවලම්භයද මෙකී විශ්ලේෂණයන් සඳහා යොදා ගත හැකිය. එසේම ශුභවාදී ලෙස භූ ව්‍යාධීන්ගෙන් නිවෙස සුරක්ෂා කර ගැනීමට පිරමීඩ ආශ්‍රිත මෙවලම් භාවිත කළ හැකිය.
Post a Comment