කොළඹ සිට සීගිරිය නැරඹීම සඳහා පැමිණ දඹුල්ල, පැල්වෙහෙර ප්‍රදේශයේ පිහිටි අවහන්හලකින් ආහාර ගැනීමට පැමිණි විදේශීය සංචාරකයකුගේ අමතක වී ගිය රුපියල් ලක්ෂ 18කට අධික දේශීය මුදල් හා විදේශීය මුදල් විශාල ප්‍රමාණයක් ඇතුළු අනෙකුත් උපකරණ අන්තර්ගත විදේශීය සංචාරකයාගේ අත් බෑගය එම විදේශීය සංචාරකයාට භාරදීම දඹුල්ල, පැල්වෙහෙර ප්‍රදේශයේ අවන්හල් හිමියකු විසින් පෙරේදා (22) සිදුකෙරිණි.
නමින් ටෙනී මාර්ටින් ස්ටයිම් නම් මෙම ඔස්ට්‍රේලියානු ජාතිකයා සිය පවුලේ තවත් සාමාජිකයින් තිදෙනකු සමගින් වෑන් රථයකින් දින 12ක සිය සංචාරය තුළ 22 දින දහවල් සීගිරිය නරඹා සිය දහවල් ආහාර ගැනීම සඳහා පෙරේදා හවස 2.00ට පමණ දඹුල්ල, පැල්වෙහෙර ප්‍රදේශයේ පිහිටි ආරිය රෙස්ට් අවහන්හල වෙත පැමිණ ඇත.
එලෙස දහවල් ආහාරය ලබා ගැනීමෙන් පසු එම අවන්හලෙන් නැවත ඔවුන් 22 රාත්‍රියේ නවාතැන් ගැනීමට නියමිත සීගිරිය ප්‍රදේශයේ හෝටලය වෙත පිටත්ව ගොස් තිබේ.
එසේ සිය නවාතැන් පළට පැමිණි අවස්ථාවේ තම මුදල් ඇතුළු වටිනා අත් බෑගය තමන් ළඟ නොමැති බව දැනගත් ටෙනී මාටින් ස්ටයිම් මහතා ඒ පිළිබඳව කලබල වී ඔවුන්ට මඟපෙන්වීම සඳහා පැමිණි සංචාරක මාර්ගෝපදේශකවරයාට ඒ බව දැනුම් දී ඇත.
ඒ අනුව ක්‍රියාත්මක වූ එම සංචාරක මාර්ගෝපදේශකවරයා එම විදේශීය සංචාරකයින් පිරිස ආහාර ගනු ලැබූ අවන්හලේ හිමිකරුව දුරකතනයෙන් අමතා එම විදේශිකයා සතුව තිබූ අත් බෑගය නැතිවීම හා එය අවන්හලේ තිබේද යන්න පිළිබඳව විමසීමෙන් අනතුරුව එම අවන්හලේ හිමිකරු වන කේ.පී. ආරියදාස මහතා එය සුරක්ෂිතව තම අවන්හල තුළ තබා ඇති බවත් එය ලබා ගැනීම සඳහා එහි හිමිකරුව කැඳවාගෙන එන ලෙසට ඔහුට දැනුම් දී ඇත.
ඒ අනුව පැය 04 කට පමණ පසු තමන් ආහාර ගත් අවන්හලේ අමතක වී ගිය මුදල් හා අනෙකුත් උපකරණ ඇතුළත් අත් බෑගය සුරක්ෂිතව තිබෙනු දැක ඔහු මහත් සතුටට පත්විය.
සියලු දෙනා ඉදිරියේ එම විදේශිකයාට අයත් අත් බෑගය ඔහුගේ අතින් විවෘත කිරීමට එම අවන්හල් හිමියා විසින් ඉඩ සැලැස්වූ අතර එහිදී තම මුදල් සුරක්ෂිතව ඒ ආකාරයෙන් පවතින බවත් එම මුදල් ගණනය කිරීමට අවශ්‍ය නොවන බවත් අවන්හල් හිමියා පිළිබඳව තමන්ට දැඩි විශ්වාසයක් ඇති බවත් ප්‍රකාශ කර සිටියේය.
කෙසේ නමුත් ඊට අකැමැති වූ එම අවන්හල් හිමියා එම විදේශීය සංචාරකයා ඉදිරිපිට ඔහු සතු දේශීය හා විදේශීය මුදල් එකින් එක එම විදේශීය සංචාරකයා ඉදිරියේ ගණන් කර කොළයක ලියා නිවැරදි බවට සනාථ කිරීමෙන් පසු එම දේශීය විදේශීය මුදල්, වටිනා ජංගම දුරකතනයක් ඇතුළු ඔහුට අයත් අනෙකුත් උපකරණ මෙහිදී භාරදීමට කටයුතු කරනු ලැබුණි.
මෙහිදී එම අත් බෑගය තුළ තිබුණු රුපියල් දාසය ලක්ෂ විසිදහසක් වටිනා දේශීය මුදල් හා රුපියල් දෙලක්ෂයකට වැඩි වටිනාකමකින් යුත් ඔස්ට්‍රේලියානු ඩොලර් 515ක් ද නැවත ඒ අයුරින්ම භාරදීම විශේෂිතය.
වසර 50ක් ඔස්ට්‍රේලියාවේ ස්ථීරව පදිංචි වී සිටින මෙම ටෙනී මාර්ටින් ස්ටයිම් මහතා මෙරට උපත ලද පුද්ගලයකු වීම විශේෂිතය. ඔහු සිය මවුරට දැක බලා ගැනීමට පැමිණි අවස්ථාවේ මෙම අනපේක්ෂිත සිදුවීමට මුහුණ පා ඇත.
මෙම අවන්හලේ සේවකයන්ගේ අවංකභාවයට කෘත ගුණ දැක්වීමක් ලෙසට එම සේවකයන් වෙත ඔහු සතු මුදලින් රුපියල් 50,000ක මුදලක් බෙදාදීමට කළගුණ දත් මෙම විදේශීය සංචාරකයා කටයුතු කිරීමද මෙහි දී විශේෂයෙන් සඳහන් කළ යුතුව ඇත.
සිරිපුර – මදුශානි අබේසිංහ
Source – Dinamina
Post a Comment