කඳානේ සුඛෝපභෝගී නිවසකින් අයිස් මත්ද්රව්ය නිෂ්පාදනයට යොදා ගන්නා බවට සැක කරන රසායනික ද්රව්ය තොගයක් සොයා ගැනීමෙන් පසු, පොලිසිය පවසන්නේ ඒවා වැඩිදුර පරීක්ෂණ සඳහා රජයේ රස පරීක්ෂකවරයා වෙත යොමු කර ඇති බවයි.
කළුතර අපරාධ කොට්ඨාසයට ලැබුණු තොරතුරක් මත, කඳාන පොලිසිය සමඟ එක්ව ඊයේ සවස කඳාන දුම්රියපල මාර්ගයේ අතුරු මාර්ගයක පිහිටි දෙමහල් නිවසක් පරීක්ෂා කිරීමේදී, කිලෝග්රෑම් 2,500කට වැඩි මෙම රසායනික ද්රව්ය තොගය සොයාගෙන තිබේ. එහිදී, නිවස තුළ මෙන්ම යාබද වල්බිහි වූ ඉඩමක වළ දමා තිබූ ස්ථාන කිහිපයකින් ද ඒවා හමු වී ඇත.
මෙම නිවස මාසිකව රුපියල් 150,000ක කුලී පදනම මත පසුගිය අගෝස්තු 11 වැනිදා පස් දෙනෙකුගෙන් යුත් පිරිසකට ලබා දී ඇති බවට විමර්ශනවලදී අනාවරණය වී තිබේ. නිවෙස් හිමියාගෙන් ප්රශ්න කිරීමේදී හෙළි වී ඇත්තේ, ඉතා වැදගත් පෙනුමක් ඇති මෙම පිරිස සුඛෝපභෝගී මෝටර් රථයකින් පැමිණි බවයි. නිවසට යාබදව පදිංචිකරුවන් පවසා ඇත්තේ, උස් තාප්පයකින් වට වූ සහ ආරක්ෂක කැමරා සවි කර තිබූ මෙම නිවසින් දිවා රාත්රී කාලයේ යන්ත්ර ක්රියාත්මක වන ශබ්ද ඇසුණු බවයි. මෙම ස්ථානය නිවෙස් සහ ගෙවතු අලංකරණයට යොදා ගන්නා කැට වර්ග නිෂ්පාදනය කරන ස්ථානයක් බවට අසල්වාසීන්ට ඒත්තු ගැන්වීමට උත්සාහ කර ඇති බව ද ඔවුන් පවසා තිබේ.
අත්අඩංගුවට ගත් සුදු පැහැති කැට සහ කුඩු සහිත රසායනික ද්රව්ය,
නිවසේ මල් පාත්ති සහ මල් පෝච්චිවල අලංකරණයට යොදා ඇති අතර, තවත් විශාල ප්රමාණයක් නිවසට යාබද වල්බිහි වූ ස්ථානවල වළ දමා තිබුණි. මෙම සිද්ධියට සම්බන්ධ කිසිදු සැකකරුවකු මෙතෙක් අත්අඩංගුවට ගෙන නොමැති අතර, නිවසේ කුලී පදනම මත පදිංචිව සිටි තරුණ යුවළක් සහ දරුවකු නිවසින් පලා ගොස් ඇති බවට පොලිසිය සඳහන් කරයි. පෑලියගොඩ අපරාධ ස්ථාන පරීක්ෂණ නිලධාරීන් විසින් මේ වන විට සිද්ධිය සම්බන්ධව ස්ථාන පරීක්ෂණ පවත්වන අතර, කළුතර අපරාධ කොට්ඨාසය කඳාන පොලිසිය සමඟ එක්ව වැඩිදුර විමර්ශන සිදු කරයි.
කඳාන නිවසේ තිබී හමුවූ අයිස් මත්ද්රව්ය නිෂ්පාදනයට ගෙන්වූ රසායනික ද්රව්ය තොගය මිද්දෙණිය ප්රදේශයෙන් රැගෙනවිත් ඇති බවට පොලිස් විමර්ශනවලදී අනාවරණය වී තිබේ. ඉන්දුනීසියාවේ සිට මෙරටට ගෙන්වූ සංවිධානාත්මක අපරාධකරුවකු වන පානදුර නිලංගගේ ගෝලයෙකුගෙන් කරන ලද ප්රශ්න කිරීම්වලින් මෙම තොරතුරු හෙළි වී ඇත. මූලික පරීක්ෂණවලදී හෙළි වී ඇත්තේ, අදාළ නිවසේ තිබී හමුවූ රසායනික ද්රව්ය තොගය කිලෝග්රෑම් 4,000කට ආසන්න බවයි. ඒවා රජයේ රස පරීක්ෂක දෙපාර්තමේන්තුවේ නිලධාරීන් විසින් පරීක්ෂාවට ලක් කර ඇති අතර, ඒ පිළිබඳ වාර්තාවක් ඉදිරියේදී ලැබීමට නියමිත බව පොලිසිය සඳහන් කළේය.
මිද්දෙණිය-තලාව ප්රදේශයේ ඉඩමක ද මෙවැනිම රසායනික ද්රව්ය තොගයක් සොයාගෙන ඇති අතර, එහි වළ දමා තිබූ පොලිස් නිලධාරීන් ක්ෂේත්ර රාජකාරි සඳහා භාවිතා කරන උපකරණ කිහිපයක් ද හමු වී ඇත. ඒ අතර පොලිස් ක්රීඩා ඇඳුම්, ක්ෂේත්ර රාජකාරි සඳහා භාවිතා කරන උපකරණ සහ නිල ඇඳුම් මැසීමට භාවිතා කරන රෙදි තොගයක් ද තිබී ඇත. කඳාන නිවස සොයාගෙන ඇත්තේ ද පානදුර නිලංගගේ අපරාධවලට අනුබල දුන් ඇඹිලිපිටියේ සුරංග නැමැත්තාගෙන් ලද තොරතුරු අනුව බව පොලිසිය පවසයි.
මෙම නිවස මාස කිහිපයකට පෙර ක්රිෂාන් නැමැත්තෙකු විසින් මසකට රුපියල් ලක්ෂ එකහමාරක කුලියකට ලබාගෙන ඇති බව ද කළුතර කොට්ඨාස අපරාධ විමර්ශන කාර්යාංශය විසින් අනාවරණය කරගෙන තිබේ. මෙම ස්ථානයේ අයිස් මත්ද්රව්ය නිෂ්පාදනය කිරීමට සූදානමින් සිටි බව සුරංග පවසා ඇත. මෙම ස්ථානයේ නවතැන්ගෙන සිටි ක්රිෂාන් නැමැති පුද්ගලයා කෙහෙල්බද්දර පද්මේගේ සමීපතමයෙකු බව ද පොලිසිය සඳහන් කළේය. මිද්දෙණියෙන් රසායනික ද්රව්ය සොයා ගැනීමත් සමග, පසුගිය සැප්තැම්බර් 6 වනදා ක්රිෂාන් අදාළ නිවසින් පලා ගොස් ඇති බවට පොලිසිය පවසයි. ඒ අනුව ඔහුව අත්අඩංගුවට ගැනීමට නියමිත අතර, සිද්ධිය සම්බන්ධ වැඩිදුර විමර්ශන කඳාන පොලිසිය විසින් සිදු කරනු ලබයි.
Post a Comment