මේ කියන්න හදන්නේ වික්‍රමාන්විත කතාවක්..
එන්ජිම නොමැති බෝට්ටුව ලෑලි කෑල්ලක් හබලක් ලෙස යොදාගෙන පදවාගෙන ගොස් බොල්ගොඩ ගඟට ඇද වැටී දියේ ගිලී හෝ කිඹුලන්ට බිලි වීමට ඉඩ තිබූ වයෝවෘද්ධ මවකගේ ජීවිතය පවුල් සෞඛ්‍ය සේවිකාවකගේ තීක්‍ෂණ ඇස සහ පානදුර උතුර පොලිසියේ ස්ථානාධිපතිවරයා ප්‍රමුඛ නිලධාරීන්ගේ ක්ෂණික මැදිහත්වීම හේතුවෙන් බේරා ගැනීමට හැකි වු බව ප්‍රදේශවාසීන් පවසනවා.
මෙලෙස දිවි බේරා ගැනීමට හැකිවී ඇත්තේ, තංගමල වත්ත, හපුතලය පදිංචි සිටි පොන්නන් කාමච්චි නැමැති 67 හැවිරිදි වයෝවෘද්ධ මවක්.
ඇය මීට මාසෙකට පමණ ඉහතදී සිය ස්වාමිපුරුෂයා සමඟ සිය පුතු පදිංචි පානදුර උතුර ගොරකාන කඳුරුදුව ප්‍රදේශයේ නිවසට පැමිණ ඇති අතර පුතු සහ ලේලිය ඇල්පිටිය ප්‍රදේශයේ අවමංගල නිවසකට සහභාගි වීමට පිටත්ව ගොස් සිටි බැවින් ඇය කාන්සිය නිවා ගැනීම සඳහා ඊයේ (1) බොල්ගොඩ ගඟ අසබඩ ඇවිඳිමින් සිට ඇතැයි පොලිස් විමර්ශනවලදී අනාවරණය වී තිබුණා.
බොල්ගොඩ ගඟේ බැස යන ජලයෙන් මූහුණ සෝදා ගැනීමට සිතක් පහළ වී මඳක් පහත් වි මුහුණ සෝදා ගැනීමේදී එකවරම ඇයට කලාන්තය සෑදී ගඟට ඇද වැටි ඇති අතර කාත් කවුරුත් එම ප්‍රදේශයේ නොමැති වීම හේතුවෙන් කිසිවකු ඇයට සිදුවූ හදිසි අනතුර දැක තිබී නැතැයි පොලිසිය පවසනවා.
ඇයගේ වාසනාවට මෙන් මෑතදී බණ්ඩාරගම සෞඛ්‍ය වෛද්‍ය නිලධාරී කාර්යාලයේ සිට ස්ථාන මාරු වීම්ලබා පානදුර සෞඛ්‍ය වෛද්‍ය නිලධාරී කාර්යාලය වෙත රාජකාරී වාර්තාකර ගොරකාන කදුරුදුව පවුල් සෞඛ්‍ය සේවිකා ලෙස රාජකාරී භාරගෙන තිබූ තේජා චන්ද්‍ර ලේකා ලියනගේ මහත්මිය එම ප්‍රදේශයේ රාජකාරී කටයුතුවල යෙදී සිටියදී සිය අවධානය බොල්ගොඩ ගඟ දෙසට යොමුවීමෙන් ගඟේ වැටී සිටි කාන්තාව ඇයගේ නෙත ගැටී තිබුණා.
ඒ වන විට එම ස්ථානයට ඔරුවක් පදවාගෙන යමින් සිටි පුද්ගලයකුද ළඟාවී ඇති අතර එම පුද්ගලයා ඇයට පවසා ඇත්තේ එම කාන්තාව මියගොස් ඇති බවකි.
නමුත් ඒ බව පිළිනොගත් පවුල් සෞඛ්‍ය සේවිකාව 119 පොලිස් හදිසි ඇමතුම් අංශය අමතා මේ බව දැනුම්දීමත් සමඟම පානදුර උතුර පොලිසියේ ස්ථානාධිපති ප්‍රධාන පොලිස් පරීක්ෂක ඩබ්ලිව්. ඒ. ටි. සරත්චන්ද්‍ර මහතා ප්‍රමුඛ නිලධාරීන් විනාඩි කිහිපයක් තුළදී එම ස්ථානයට වහා ළඟාවීමත් සමඟම ඒ වනවිටත් එම ස්ථානයේ රැඳී සිටි පවුල් සෞඛ්‍ය සේවිකාව ස්ව කැමැත්තෙන්ම පොලිස් නිලධාරීන් සමඟ කාන්තාවගේ දිවි බේරා ගැනීමට ඉදිරිපත් වී තිබුණා.
වයෝවෘද්ධ මව වැටී සිටි ස්ථානයට ක්ෂණිකව ළඟාවීමට එම අවස්ථාව වන විට ඔරුවක් හෝ බෝට්ටුවක් නොමැතිවීම හේතුවෙන් මහත් අසරණ වූ පොලිස් නිලධාරීන් එන්ජිමක් නොමැති බෝට්ටුවක් ඒ ආසන්නයේ තිබෙනු දැක එය රැගෙන හබලකට ලෑල්ලක් උපයෝගී කරගෙන පවුල් සෞඛ්‍ය සේවිකාවද එයට නංවාගෙන වයෝවෘද්ධ මව සිටිනා ස්ථානය කරා ළඟාවී ඇය බෝට්ටුවට ඉතා අපහසුවෙන් නංවා ගැනීමට කටයුතු කර තිබුණා.
එහිදී වහා ක්‍රියාත්මක වූ පවුල් සෞඛ්‍ය සේවිකාව ඇයට මූලික ප්‍රතිකාර ලබා ලබාදී ප්‍රකෘති තත්ත්වයට පත් කිරීමට කටයුතු කර තිබුණා.
එයින් යම් අස්වැසිල්ලක් ලද වයෝවෘද්ධ මවගෙන් මේ පිළිබඳ විමසීමේදී තමන් මුහුණ සේදීම සඳහා පහත්වීමත් සමඟම සිදුවූ දෙයක් මතක නැති බවත් ඇය පොලිසිය හමුවේ ප්‍රකාශ කර තිබුණා.
පානදුර උතුරු පොලිසියේ ස්ථානාධිපතිවරයා ප්‍රමුඛ නිලධාරීන් සහ විශේෂයෙන් ගොරකාන කදුරු දූව වසමේ පවුල් සෞඛ්‍ය සේවිකාවගේ ක්ෂණික අවධානය යොමුවීම හේතුවෙන් වයෝවෘද්ධ මවගේ දිවි බේරා ගැනීමට හැකි වූ බව පවසමින් ප්‍රදේශවාසීන් ප්‍රශංසා කළා.
මෙම සත්කාරය සඳහා පානදුර උතුර පොලිසියේ ස්ථානාධිපති ප්‍රධාන පොලිස් පරීක්ෂක ඩබ්ලිව්. ඒ. ටි. සරත්චන්ද්‍ර පොලිස් කොස්තාපල්වරුන් වන 93610 බණ්ඩාර, 28765 බණ්ඩාර, 91862 ශානක, බහු කාර්ය සේවක සුමිත් සමන්ත යන අය දායක වුණා.
Source – Hiru News
Post a Comment