වෙරළ පරිසර පද්ධතියට බැහැර කර තිබෙන අපද්‍රව්‍යවල වෙළෙඳ නාම සංගණනයක් සිදුකර අදාළ සමාගම්වලට විරුද්ධව නීතිමය පියවර ගැනීමට සමුද්‍රීය පරිසර ආරක්ෂණ අධිකාරිය සැලසුම් කර ඇත.
මෙම මස 20 වැනිදාට යෙදී ඇති ‘අන්තර්ජාතික වෙරළ පවිත්‍රතා දිනය’ පිළිබඳව දැනුවත් කිරීමට පරිසර අමාත්‍යාංශයේදී ඊයේ (17 වැනිදා) පැවැති මාධ්‍ය හමුවේදී මේ බව අනාවරණය විය.
අන්තර්ජාතික වෙරළ පවිත්‍රතා දිනයට සමගාමීව පවත්වනු ලබන ජාතික වැඩසටහන මෙමස 20 වැනිදා පෙරවරු 7.30 සිට පෙරවරු 11.00 දක්වා පානදුර වෙරළ උද්‍යානයේදී පැවැත්වීමට නියමිතය. ඊට අමතරව කිලෝමීටර් 100ක වෙරළ කලාපයක් ද පිරිසුදු කිරීමට සැලසුම් කර තිබේ.
මෙම වෙරළ පිරිසුදු කිරීමට සමගාමීව වෙරළ පරිසරයට බැහැර කර තිබෙන අපද්‍රව්‍යවල වෙළෙඳ නාම සංගණනයක් ද සිදුකිරීමට නියමිතය.
සමුද්‍රීය පරිසර ආරක්ෂණ අධිකාරි පනත සංශෝධනය කිරීමට පියවර ගෙන තිබෙන බවත් ඒ අනුව වෙරළ කලාපයේ තිබෙන අපද්‍රව්‍යවල ඇති වෙළෙඳ නාමවලට අදාළ සමාගම්වලට පළමුව අවවාද කර පසුව නීතිමය පියවර ගන්නා බවත් එම අධිකාරියේ සභාපති සමන්ත ගුණසේකර පැවැසීය.
මෙරට පරිහරණය කෙරෙන පොලිතින් සහ ප්ලාස්ටික්වලින් සියයට අසූ දෙකක් (82%)ක් මුහුදට එකතුවන බව කී සභාපතිවරයා ඉන් සියයට දහයක් (10%)ක් වෙරළ කලාපය ආශ්‍රිතව රැඳෙන බවත්, සියයට දෙකක් (2%)ක් සාගර කලාපය ආශ්‍රිතව පාවෙන බවත් පැවැසුවේය.
තවද මෝසම් සුළං සමග මෙරට වෙරළ කලාපයට කිලෝ දහස් ගණනින් පොලිතින් සහ ප්ලාස්ටික් අපද්‍රව්‍ය එකතුවන බවද ඔහු සිහිපත් කළේය.
ඉන්දියාවේ කේරළ මුහුදු කලාපයේදී ඉකුත් මැයි මස 25 වැනිදා ගිනි ගැනීමට ලක්වූ M.S.C. එල්සා නැවේ තිබූ පොලිතින්, ප්ලාස්ටික් ආදිය ඉතා විශාල ලෙස මෙරට වෙරළ කලාපයට එකතුවුණා. එහි තිබූ රසායනික ද්‍රව්‍ය බැරල් ගණනාවක් සාගරයට එකතුවුණා. මෙම නැව නිසා මෙරට සාගර කලාපයට සිදුවූ හානියට වන්දි ගෙවීමට එම නැව් සමාගම සහ රක්ෂණ සමාගම එකඟතාව පළකර තිබෙනවා.
මෙරට වෙරළ හා සාගර කලාපයට මෙන්ම සාගර ජීවීන්ට එම අපද්‍රව්‍යවලින් සිදුවූ හානිය වන සංරක්ෂණ දෙපාර්තමේන්තුව, වෙරළ සංරක්ෂණ දෙපාර්තමේන්තුව, සමුද්‍රීය පරිසර ආරක්ෂණ අධිකාරිය සහ නාරා ආයතනය මගින් ගණනය කරමින් තිබෙනවා.’’ යැයිද සභාපතිවරයා සඳහන් කළේය.
Post a Comment