දරුවන්ට නිවසේදී, පාසලේදී හෝ රැඳවුම් නිවාසවලදී ශාරීරික වශයෙන් සහ මානසික වශයෙන් දඬුවම් කිරීම, නොසලකා හැරීම ඇතුළු විවිධ ක්‍රියා මගින් කෲරත්වයට පත්කිරීම තහනම් කරමින් ආණ්ඩුව විසින් දණ්ඩ නීති සංග්‍රහය සංශෝධනය කරමින් නව නීතියක් පාර්ලිමේන්තුවට ඊයේ (24දා) ගෙන එනු ලැබීය.
කාන්තා සහ ළමා කටයුතු ඇමැතිනී සරෝජා සාවිත්‍රි පෝල්රාජ් මහත්මිය මෙම නීති සංශෝධනය පාර්ලිමේන්තුවට ඊයේ පෙරවරුවේ ඉදිරිපත් කළාය.
කෙසේ වෙතත් එය දිනය පුරා විවාදයට ගනු ලැබුව ද එය සම්මත කිරීම වෙනත් නීති සංශෝධනයක් සමග ඉදිරි දිනකදී සිදු කරන බව විවාදය අවසානයේදී ඇමැතිවරිය ප්‍රකාශ කරනු ලැබුවාය.
දණ්ඩ නීති සංග්‍රහයේ 308, 314 සහ 316 යන වගන්ති සංශෝධනය කෙරෙන අතර දරුවන් දණ්ඩනයට ලක් කිරීම මූලික මිනිස් අයිතිවාසිකම් උල්ලංඝනය කිරීම යන කාරණයක් ලෙස සලකා ඇතැයි ඇමැතිවරිය මෙහිදී සඳහන් කළාය. අදාළ සංශෝධනය මගින් බලාපොරොත්තු වන්නේ සියලුම ආකාරයේ හිංසනයන්ගෙන් දරුවන් මුදා ගැනීම බවත් ඇය පැවසුවාය.
දරුවන් නිවැරදි කිරීමේ අරමුණින් කායික මානසික සහ වාචික, හිංසනයන් සිදු කිරීම මෙම නීතියට අනුව අපරාධයක් ලෙස සලකා ඇති බවද ඇය කීවාය.
මෙම නීතිය සම්මත කිරීමෙන් පසුව මව්පියන්, ගුරුවරුන්, වැඩිහිටියන් ලෙස දරුවන් හිංසනයට හෝ කෲරත්වයට පමුණුවීමේ අවස්ථාවක් නොලැබෙන අතර දරුවන් සම්පූර්ණයෙන්ම ඔවුන් ජීවත්වන ප්‍රදේශයේ දිසා විනිසුරුවරයාට අයත් වන බවද සඳහන් කළාය.
විශේෂයෙන් පාසල් තුළදී ද දරුවන්ගේ ආත්මාභිමානයට හානි කරන දණ්ඩනයන්ට ලක් කිරීමට නොහැකි අතර දරුවන්ගේ කොණ්ඩය කපා දැමීම, ගවුමේ වාටිය ලිහීම, සපත්තු පොලිෂ් හිසේ ගෑම ආදී ක්‍රියා සිදු කිරීම කෙලෙසකවත් සිදු කළ නොහැකි බව ද ඇමැතිනිය කීවාය.
Post a Comment