ගිනිකොන දිග බෙංගාල බොක්ක මුහුදු ප්‍රදේශයේ පැවැති අඩු පීඩන කලාපය අද (25) දින උදෑසන 05.30ට පමණ පීඩන අවපානයක් දක්වා වර්ධනය වී ඇති බව කාලගුණ විද්‍යා දෙපාර්තමේන්තුව ප්‍රකාශ කරයි.
ඒ අනුව එම දෙපාර්තමේන්තුව වර්ධනය වූ එම පීඩන අවපානය මඩකලපුවේ සිට කිලෝ මීටර් 900 ක් පමණ ඊසාන දෙසින් උතුරු අක්ෂාංශ 10.9 ත්, නැගෙනහිර දේශාංශ 89.0න් ආශ්‍රිතව ස්ථාන ගතව පැවතුණු බව සඳහන් කරයි.
එසේම මෙම පද්ධතිය බටහිරට බරව වයඹ දිශාවට ගමන් කරමින් හෙට (26) දින ගැඹුරු පීඩන අවපානයක් සහ 27 වැනි දින සුළිකුණාටුවක් දක්වා නව දුරටත් වර්ධනය වන බවත් සඳහන්.
අනතුරුව ලබන පැය 48 තුළදී අන්ද්‍රා ප්‍රදේශ් වෙරළ දෙසට ගමන් කරනු ඇතැයි බලාපොරොත්තු වන බවත් එම දෙපාර්තමේන්තුව දක්වා ඇත.
මේ නිසා උතුරු අක්ෂාංශ 05න් 15 ක් සහ නැගෙනහිර දේශාංශ 80 -95 න් අතර මුහුදු ප්‍රදේශ වල යළි දැනුම් දෙනතුරු ධීවර සහ නාවික කටයුතු වලින් වැළකී සිටින මෙන් කාලගුණ විද්‍යා දෙපාර්තමේන්තුව අදාළ පාර්ශ්වයන්ගෙන් ඉල්ලීමක් කර තිබෙනවා.
එසේම දැනටමත් එම ප්‍රදේශ ආශ්‍රිතව ධීවර කටයුතු වල යෙදී සිටී නම් එම මුහුදු ප්‍රදේශ වලින් හැකි ඉක්මනින් ඉවන්වන ලෙසන් කාලගුණ විද්‍යා දෙපාර්තමේන්තුව අදාළ පාර්ශ්වයන්ට දැනුම් දී තිබෙනවා.
ඊට අමතරව අඳාළ නිවේදනයේ වැඩි දුරටත් දක්වා ඇත්තේ යළි දැනුම්දෙන තුරු කන්කසන්තුරය සිට ත්‍රිකුණාමලය හරහා මඩකලපුව දක්වා වෙරළට ඔබ්බෙන් වන නොගැඹුරු මුහුදු ප්‍රදේශ ආශ්‍රිතව ධීවර සහ නාවික කටයුතු වලින් වැළකී සිටින ලෙසයි.
Post a Comment