ගත සිත සුවපත් කරන මුදල් පසුම්බියට අගයක් හා වටිනාකමක් එකතු කරන දියුණුවට මග කියන හයිබි්‍රඩ් දාස් පෙතියා මල් වගාව ගැන ලස්සන කතාවක් තම‍යි ඔබට මේ කියන්න යන්නේ..
මේ ඇත්තටම ඒ ගැන ඇල්මක් දක්වන ඔබට සුබම සුබ ආරංචියක්. ස්වයං රැකියා ලාභීන්හට ඉහළ ආදායමක් ලබාගත හැකි වාණිජ වගාවක් ලෙස දෙමුහුන් (Hybrid) දාස්පෙතියා මල් වගා කිරීමේ ව්‍යාපෘතිය අනුරාධපුර නැගෙනහිර නුවරගම් පළාත ප්‍රාදේශීය ලේකම් කොට්ඨාසය තුළ ප්‍රචලිත කිරීමේ වැඩසටහනක් එම ප්‍රාදේශීය ලේකම් කාර්යාලය මගින් ආරම්භ කර තිබෙනවා.
මේ සඳහා එම ප්‍රාදේශීය ලේකම් කොට්ඨාසයේ පදිංචිව සිටින රැකියා විරහිත ප්‍රතිලාභීන් 200 දෙනෙක් සඳහා පුහුණු වැඩසටහනක් අනුරාධපුර නැගෙනහිර නුවර ගම් පළාත ප්‍රාදේශීය ලේකම් සම්පත් රෝහණ ධර්මදාසගේ ප්‍රධානත්වයෙන් පසුගියදා තුරුවිල නව ගම්මානයේ දී පැවැත්වී තිබුණා.
තම දෛනික වියදමට අතිරේක ආදායමක් උපයමු, යන තේමාව පෙරදැරිව වාණිජ වගාවක් ලෙස දාස්පෙතියා වගාව කිරීමට කැමැත්තක් දක්වන එම ප්‍රාදේශීය ලේකම් කොට්ඨාසයේ පදිංචිව සිටින රැකියා විරහිත ප්‍රතිලාභීන් 200 දෙනෙක් උදෙසා මෙම පුහුණු වැඩසටහන පෞද්ගලික සමාගමක් සමග එක්ව ක්‍රියාත්මක කෙරෙනු ඇතියි.
වර්ෂාව හේතුවෙන් මේ දිනවල වැව් අමුණු පිරී ඉතිරී යෑමත් සමග අනුරාධපුර දිස්ත්‍රික්කයේ වැව්වල පිපෙන ඕලු, නෙළුම්, මානෙල් වගේ මල් වර්ග හැදෙන්නේ නැහැ. එවිට මේ හියිබි්‍රඩ් දාස් පෙතියා මල්වලට හොඳ ඉල්ලුමක් වගේම ඉහළ මිලක් ලබා ගැනීමට ප්‍රතිලාභීන්ට හැකියාව ලැබෙන බව අදාළ පෞද්ගලික සමාගමේ අධ්‍යක්ෂවරයකු වන ඉන්දික ප්‍රියදර්ශන මහතා සඳහන් කළා.
ඒ අනුව අනුරාධපුර අටමස්ථානය වන්දනා කිරීමට දිවයිනේ දසතින් පැමිණෙන වන්දනාකරුවන්ට ලොකු දාස්පෙතියා මලක් රුපියල් 10.00 ත් 15.00 අතර මිලකටත් කුඩාම මලක් රුපියල් 3.00 ක් වැනි මුදලකටත් අලෙවි කිරීමට හැකියාව ඇති බවත් හෙතෙම පැවසුවා.
මෙම වැඩසටහන සඳහා ප්‍රතිලාභීන් 200 කට ආසන්න පිරිසක් සහභාගි වූ අතර දෙමුහුන් දාස්පෙතියා වගා ක්ෂේත්‍රය පිළිබඳව පැහැදිලි කර දීම සහ ඒ සඳහා ප්‍රතිලාභීන්ට අදාළ සමාගමෙන් ලැබෙන දායකත්වය පිළිබඳව එහිදී හඳුන්වා දෙනු ලැබුණා.
නැගෙනහිර නුවරගම් ප්‍රාදේශීය ලේකම් කාර්යාලයේ සහකාර අධ්‍යක්ෂ (සැලසුම්) ඇම්. ඒ. විමලරත්නගේ මගපෙන්වීම යටතේ අංක 239 වන්නි තම්මැන්නාගම සහ අංක 276 කීරික්කුලම ග්‍රාම නිලධාරී තුලාන් භාර ආර්ථික සංවර්ධන නිලධාරිනී ජේ. පී. ප්‍රියංගනීගේ සංවිධානයෙන් මෙම ව්‍යාපෘතිය අනුරාධපුර කීරික්කුලම ප්‍රදේශයේ දැනටමත් ක්‍රියාවට නැංවෙනවා.
Post a Comment