ලංකා පොලිසියේ වසර 36ක වෘත්තීය ජීවිතයක් ගත කරන ජ්‍යෙෂ්ඨ නියෝජ්‍ය පොලිස්පති ප්‍රියන්ත වීරසූරිය මහතා 2024 සැප්තැම්බර් මාසයේදී වැඩබලන පොලිස්පති (IGP) ලෙස පත් කරන ලද අතර, එම බලකායේ වසර 158ක ඉතිහාසයේ පොලිස් කොස්තාපල් තනතුරේ සිට ඉහළම තනතුරට පත්වූ පළමු නිලධාරියා බවට පත්විය.
මුල් කාලීන වෘත්තීය ජීවිතය
වීරසූරිය 1969 දී දොඩන්ගොඩ හි උපත ලැබූ අතර 1988 දී වයස අවුරුදු 19 දී කොස්තාපල්වරයෙකු ලෙස පොලිස් හමුදාවට බැඳුණි. 1980 දශකයේ අගභාගයේ කැරැල්ල අතරතුර පොලිස් විශේෂ කාර්ය බලකායේ, රථවාහන සහ අපරාධ අංශවල සේවය කළේය. 1992 දී, ඔහු උප පරීක්ෂක තනතුරට උසස් කර මරදාන, වවුනියාව සහ කොම්පඤ්ඤවීදිය යන ස්ථානවලට පත් කරන ලදී.
සේවය කරන අතරතුර, ඔහු කොළඹ විශ්ව විද්‍යාලයෙන් නීති උපාධියක් ලබා, නීතිඥයෙකු ලෙස සුදුසුකම් ලබා, 1999 දී සෘජු ප්‍රවේශ විභාගයෙන් සහකාර පොලිස් අධිකාරී තනතුරට උසස් කරන ලදී. ඔහු ව්‍යාපාර පරිපාලනය පිළිබඳ උපාධියක් සහ පසුව නීතිය පිළිබඳ ශාස්ත්‍රපති උපාධියක් ද සම්පූර්ණ කළේය.
උසස්වීම් සහ පැවරුම්
• 1988: කොස්තාපල්වරයෙකු ලෙස සම්බන්ධ විය; විශේෂ කාර්ය බලකායේ සහ රථවාහන/අපරාධ අංශවල සේවය කළේය.
• 1992: උප පරීක්ෂකවරයෙකු ලෙස උසස් කරන ලදී; කොළඹ සහ ගැටුම්වලින් පීඩාවට පත් වවුනියාවේ තනතුරු.
• 1999: නීතිඥයෙකු ලෙස සුදුසුකම් ලැබීමෙන් පසු සහකාර අධිකාරීවරයෙකු ලෙස උසස් කරන ලදී.
• 2007: අධිකාරීවරයෙකු ලෙස උසස් කරන ලදී; පොලිස් නීති සහ සැපයුම් අංශයේ අධ්‍යක්ෂ ලෙස පත් කරන ලදී.
• 2007–2010: නැගෙනහිර ටිමෝරයේ සහ හයිටියේ එක්සත් ජාතීන්ගේ සාම සාධක මෙහෙයුම්වල සේවය කළේය.
• 2016: නියෝජ්‍ය පොලිස්පතිවරයෙකු ලෙස උසස් කරන ලදී; 2020 දක්වා පොලිස් සැපයුම් අංශයේ නායකත්වය දැරීය.
• 2020: ජ්‍යෙෂ්ඨ නියෝජ්‍ය පොලිස්පතිවරයෙකු ලෙස උසස් කරන ලදී; උපායමාර්ගික කළමනාකරණ, අපරාධ සහ රථවාහන අංශයේ ප්‍රධානියා.
• 2024: උතුරු මැද පළාත සඳහා ජ්‍යෙෂ්ඨ නියෝජ්‍ය පොලිස්පති; දේශබන්දු තෙන්නකෝන්ගේ වැඩ තහනම් කිරීමෙන් පසු 2024 සැප්තැම්බර් 26 වන දින වැඩබලන පොලිස්පති ලෙස පත් කරන ලදී.
වීරසූරිය මහතා සිය සේවා කාර්ය සාධනය වෙනුවෙන් හිටපු පොලිස්පතිවරුන් 10 දෙනෙකුගෙන් ප්‍රශංසා ලබා ඇත.
මෙහෙයුම් අවධානය
වැඩබලන පොලිස්පතිවරයා ලෙස, වීරසූරිය සංවිධානාත්මක අපරාධවලට එරෙහි මෙහෙයුම් මෙහෙයවා ඇති අතර, 2025 පෙබරවාරි මාසයේදී පොලිසිය අපරාධ කල්ලි 58 ක් හඳුනාගෙන ඇති බවත්, එම වසරේ වාර්තා වූ වෙඩි තැබීමේ සිද්ධීන් 17 ම විසඳා ඇති බවත් වාර්තා කළේය. ඔහු විදේශීය නීතිය ක්‍රියාත්මක කරන්නන් සමඟ සහයෝගීතාව ශක්තිමත් කළ අතර, එහි ප්‍රතිඵලයක් ලෙස සැකකරුවන් 19 දෙනෙකු පිටුවහල් කිරීමට හැකි වූ අතර, මත්ද්‍රව්‍ය ජාවාරමට එරෙහි ඒකාබද්ධ මෙහෙයුම් අධීක්ෂණය කළේය.
භාරකාර වධහිංසා පැමිණවීමේ චෝදනාවලට ප්‍රතිචාර වශයෙන්, ඔහු අධිචෝදනා ගොනු කරන තෙක් නිලධාරීන් හතර දෙනෙකුගේ වැඩ තහනම් කළේය.
වීරසූරිය මහතා අභ්‍යන්තර ප්‍රතිසංස්කරණ ආරම්භ කළ අතර, විෂමාචාර වාර්තා මත පදනම්ව නිලධාරීන් මාරු කිරීම, අත්හිටුවීමෙන් පසු නැවත සේවයේ පිහිටුවීම සඳහා මත්ද්‍රව්‍ය පරීක්ෂාව අනිවාර්ය කිරීම සහ රාජකාරියේ යෙදී සිටින පොලිස් නිලධාරීන් වාර්තා කිරීමට සිවිල් වැසියන්ට ඇති අයිතිය ප්‍රසිද්ධියේ තහවුරු කිරීම ද ඇතුළත් විය. ඔහු නිලධාරීන්ගේ සෞඛ්‍යය පිළිබඳව ද කනස්සල්ල පළ කර ඇති අතර වැටුප් ගැලපීම් සඳහා පෙනී සිට ඇත.
වීරසූරිය මහතා ජාතික පොලිස් කොමිසම සමඟ ස්ථාන මාරු කිරීමේ අධිකාරිය සම්බන්ධයෙන් ආරවුලකට ද සම්බන්ධ වී ඇති අතර, සම්මුතියකට එළඹීමට පෙර එය ව්‍යවස්ථාදායක සභාවට යොමු කරන ලදී. පොලිසිය කෙරෙහි මහජන විශ්වාසය යථා තත්ත්වයට පත් කිරීම සඳහා අභ්‍යන්තර වගවීමේ පියවර සහ නිර්දේශපාලනීකරණය අවශ්‍ය බව ඔහු පවසා තිබේ.
පොලිස්පති ප්‍රියන්ත වීරසූරිය මහතා පිළිබඳව ඔහුගේ මිත්‍රයෙක් වූ නීතීඥ අරවින්ද හබක්කල මහතා තැබූ සටහනක් පහතින්.
“1992 වසරේ අපි කැම්පස් එන්නෙ මහත් වූ බලාපොරොත්තු ගොන්නක් පොදි බැඳගෙන. එහෙම ආවට පස්සෙ රටේ එක එක පලාත් වලින් විවිධ සමාජ තරාතිරම් වල යාලුවො හම්බෙනවා. ලෝ ෆැකල්ටි එක කාගෙත් ටාගට් එක ලෝයර් කෙනෙක් වීම.
ඒ අතර එක්තරා යාලුවෙක් සෙට් වෙනවා. ඔහු පොලිස්කාරයෙක්. ඒ වෙනකොට ඔහු උප පොලිස් පරීක්ශකවරයෙක්. අපි හිතුවෙ උපාධිය අරන් ඔහු යුනිෆෝම් එක ගලවල කබාය අඳීවි කියලා.
SI කෙනෙක් විදියට අපිට හම්බුනාට ඔහු ඇත්තටම පොලිසියට බැඳිල තිබ්බෙ රාළහාමි කෙනෙක් විදියට. සේවයේ ඉන්න ගමන් ඔහු උසස් පෙල ලිවීම නිසා උප පොලිස් පරීක්ශක විදියට උසස් වීමක් ලබාගෙන ඊට පස්සෙ කැම්පස් එකේ ලෝ ෆැකල්ටියත් තේරිලා.
ඔහු LL.B. උපාධිය ලබා ගත්තට පස්සෙ ASP කෙනෙක් වෙනවා. එතනින් එහාටත් ඔහු උසස් අධ්‍යාපනය හදාරනවා. විනයගරුක පොලිස්කාරයෙක් වෙනවා.
කැම්පස් එකේ හැමෝම ඔහුට කිව්වෙ පොලිස්කාරයා. සමීපම අය කිව්වෙ “පොලිසා.” පොලිස් ගතියක් නැති පොලිසා.
මිනිහෙක් යම් ආයතනයක පහලම නිළධාරියෙක් විදියට සේවයට බැඳිලා එහි ඉහලම පුටුව දක්වා ගමන් කරනව කියන්නෙ අහම්බයක් නෙමෙයි. ඒක මහත් වූ කැපකිරීම් රාශිකය හා අධිශ්ඨාන වැලක ඔටුනු පැළදීමක්.
ප්‍රියන්ත වීරසූරිය නමැති සිසුවා පාසැල් අධ්‍යාපනය ආරම්භ කරන්න කලුතර ඩොටේ හද්ද දුශ්කර නෑහින්න කනිශ්ඨ විද්‍යාලයෙන්. ඔහු ඉතාම ආඩම්බර විදියට අදටත් ඔහු ගැන කියන්නෙ.
“Im a Naahinniyan” කියලා.
මම දෙවෙනි පාරටත් මේ කතාව ලියන්නෙ මේ රටේ දෙමවුපියන්ට, දරුවන්ට පාඩමක් උගන්වන්න. ඔව් පාඩමක් උගන්වන්න.
අධ්‍යාපනය කියන්නෙ අත්තටු. අත්තටු තියෙනව නම් ඕනම ඉහල තාප්පයක් තරණය කරන්න හරිම ලේසියි. ඕනම පොඩි මිනිහෙකුට සැබෑ ලොක්කෙක් වෙන්න ලේසියි. ඕනෑම ප්‍රාදේශීයවාදයක් සුන්නද්දූලි කරන්න ඇහැකියි.
ඔබ ජීවිතය පටන් ගන්නා තැන අදාල නැත. එහෙත් අවසන් කරන තැන තීරණය කරන්නේ ඔබමය.
කුමන බාධක මැද වුවද දරුවන්ට උගන්වන්න. දරුවනි කුමන අගහිඟම් මැද වුවද ඉගෙනීම අත නොහරින්න.
ඉගෙනීමෙන් ඔබට ලැබෙන පන්නරය හා ලැඩරය කිසිවෙකුට කිසිදින උදුරාගත නොහැක. එය මරණය තෙක් ඔබේ පසුපස සෙවනැල්ලකටත් වඩා ප්‍රභලව ඝන අන්ධකාර කාලයේදීද ඔබව ආරක්ශා කරනු ඇත.
ගුරුභවතුනි, පුලුවන් නම් ඔබේ පාසලට වත්මන් පොලිස්පතිතුමා ගෙන්වා ඔහු ඉගෙනගත් හැටි දරුවන්ට කියවන්න. ඔහු හීන දුටුව හැටි අසා දැනගන්න.
හිතාදර ප්‍රියන්ත,
කොපමණ වැඩ තිබ්බත් ඔබ ආ ගමන්මග ගැන පොතක් ලියන්න. ඔබේ පුරාජේරුව ලියා තබන්න. ඒවා මේ රටේ සුවහසක් දුප්පත් දරුවො අහන්නම ඕන කතා.
පොලිස්පතිතුමනි,
මතක ඇතුව තව දෙයක් ලියන්න. අතට පයට වැඩකාරයින් ගන්න පුලුවන්කම තියෙද්දිත් DIG කාලෙත් තමන්ගෙ දෑතින් අම්මාව වඩාගෙන සාත්තු කල හැටි, කවපු හැටි. ඒවාත් ලියන්න. ඒවා මේ රටේ සුවහසක් සල්ලිකාර පුත්තු අහන්නම ඕන කතා.
ප්‍රියන්ත වීරසූරිය නමැති පොලිස් කොස්තාපල්වරයා තම රැකියාවෙන් සෑහීමට පත් වී අධ්‍යාපනය නැවතුවා නම් ඔහුගේ රාජකාරී දිවිය අවසන් කරන අන්දම හා ඔහු තම අධ්‍යාපනන නොනැවතීම නිසා පැමිණ තිබෙන ගමන දිහා හිතා බලන්න.
දරුවනි, කවුරු කෙසේ තර්ක කලත් ජීවිතය ජය ගැනීමට ඉගෙනීම අත්‍යාවශ්‍ය බව සිහි තබා ගන්න.
බරපතල විවේචන ඇති පොලිස් දෙපාර්තමේන්තුව ඔසවා තැබීමට නව පොලිස්පතිතුමාට හැකියාව ලැබේවා.
අදත් හෙටත් පොලිසියෙන් බැටකන මිනිසුන් ගැන ලියන්නට,
පොලිසිය ජනයාගේ ආරක්ශාව ගැන වග නොවන විට ලියන්නට,
පොලිසිය රජය වෙනුවෙන් නොව ආන්ඩුව වෙනුවෙන් පෙනී සිටින විට ලියන්නට,
අපේ අකුරු වෙනදා මෙන්ම සවිමත්ව ලියන්නට,
මේ සටහන බාධාවක් නොවන බව අවසන් වශයෙන් ලියා තබමි.
පොලිසි කොස්තාපල් මහත්මයෙක්, පොලිස්පතිවරයෙක් කල ඒ විචිත්‍ර වූ නිදහස් අධ්‍යාපනයද, ඒ වෙනුවෙන් දිවි දුන් සියල්ලන් හා නිර්මාණකරුවන්ද, මේ රටේ බදු ගෙවන අහිංසක ජනතාවද මහත් වූ ආදරයෙක් වැළඳ ගමි.
පොලිස්පතිතුමනි ඔබට ජය!
නීතීඥ අරවින්ද හබක්කල.
(LlL.B. LL.M.)
(නිදහස් අධ්‍යාපනය)
Post a Comment