.jpeg)
වැල්ලම්පිටිය ලයිසන්පොළ ප්‍රදේශයේදී අයිස් මත්ද්‍රව්‍ය භාවිතයට ඇබ්බැහි වූ බව සැලකෙන සැමියෙකු විසින් සිය බිරිඳට ගිනි තබා ඝාතනය කර සිව් හැවිරිදි දරුවා වහලය මත තබා පලා ගොස් ඇති බව වැල්ලම්පිටිය පොලිසිය වාර්තා කරයි.
මෙලෙස ඝාතනයට ලක් වූයේ තුෂාරි නම් වූ විවාහක 29 හැවිරිදි කාන්තාවක් වන අතර, ඇය ටික්ටොක් ඇතුළු සමාජ මාධ්‍ය ජාලවල ප්‍රකට චරිතයක් ලෙස හඳුනාගෙන තිබේ. සැකකරු වන ඇගේ සැමියා මුලින් සැඟවී සිට නමුත් පොලිස් මෙහෙයුමක් මගින් මේ වනවිට අත්අඩංගුවට ගෙන තිබේ.
පොලිසිය විසින් එළිදරව් කර ඇති ආකාරයට, සැකකරු නිවසේ වහලයට නැග වහලයේ ෂීට් ඉවත් කර ගෙය තුළට ඇතුළු වී ඇත. ඔහු පෙට්‍රල් බෝතලයක් රැගෙන ඇති අතර එය බිරිඳගේ හිසට හලා ගිනි තබා ඇත. ඝාතනය සිදු කිරීමට පෙර, සැකකරු විසින් නිවසේ ජල නළ පද්ධතිය ද විසන්ධි කර ඇති බව මූලික පරීක්ෂණවලදී අනාවරණය වී ඇත.
මෙය ගින්නෙන් ඇය බේරාගැනීමේ උත්සාහයන් අඩාල කිරීම සඳහා සිදු කළ බව පොලිසිය සැක කරයි.
සිදුවීමෙන් අනතුරුව, තම දරුවාට හානියක් වේ යැයි සිතා සැකකරු, දරුවා රැගෙන වහලයෙන් වහලයට පනිමින් අසල්වැසි නිවසක වහලය මත දරුවා තබා පලායන්නට සමත් වී ඇත. මේ වන විට දරුවා ආරක්ෂිතව පවුලේ සාමාජිකයන්ගේ භාරයට ගෙන ඇති බව පොලිසිය තහවුරු කරයි.
පරීක්ෂණවලදී හෙළිදරව් වූ කරුණු අනුව, මෙම යුවල අතර දිගු කාලයක සිට මතගැටුම් පැවති බව පෙනී යයි. මත්ද්‍රව්‍ය භාවිතය හේතුවෙන් පීඩාවට පත් වූ කාන්තාව, සැමියාගෙන් දික්කසාද වීම සඳහා නඩුවක් පවරා තිබුණි. තවද, සැමියා විසින් විටින් විට ඇයට මරණීය තර්ජන එල්ල කරමින් සිටි බැවින් ඇය මීට පෙර වැල්ලම්පිටිය පොලිසියට පැමිණිලි කිහිපයක්ද ඉදිරිපත් කර තිබුණි.
පොලිසිය විසින් එළිදරව් කර ඇති පරිදි, සැකකරු දැඩි ලෙස අයිස් නම් වූ මත්ද්‍රව්‍යවලට හා මත්පැන්වලට ඇබ්බැහි වී සිටි අතර, නිතර නිතර මත්ද්‍රව්‍ය හා මත්පැන් මිලදී ගැනීම සඳහා කාන්තාවගෙන් මුදල් ඉල්ලා ඇත. මේ සම්බන්ධයෙන් ඇතිවූ මතගැටුම් නිසා ඔවුන් අතර සම්බන්ධතාවය තවදුරටත් පිරිහී ගොස් ඇති බව ප්‍රදේශවාසීන් සඳහන් කරයි. ඔහුගේ මත්ද්‍රව්‍ය පුරුද්ද නිසා ඔහු හා ඔහුගේ බිරිඳ අතර ගැටුම් ඇති වී ඇති අතර, බිරිඳ දික්කසාද වීමේ නඩුවක් පවරා තිබීමෙන් මෙම තත්ත්වය තවදුරටත් උග්‍ර වී ඇති බව පෙනේ.
මෙම අවාසනාවන්ත සිද්ධිය, මත්ද්‍රව්‍ය භාවිතය හා ගෘහස්ථ ප්‍රචණ්ඩත්වය අතර ඇති සම්බන්ධතාවය පිළිබඳව නැවත අවධානය යොමු කරවයි. ප්‍රදේශවාසීන් පවසන පරිදි, ගෘහස්ථ ප්‍රචණ්ඩත්වයේ ලක්ෂණ දැක දැකත්, අවශ්‍ය පියවර ගැනීමට නොහැකි වීම මෙවැනි ඝාතන සිදු වීමට හේතු වන බව පෙනී යයි.
“මීට පෙරත් මේ කාන්තාව පොලිසියට පැමිණිලි කළ බව අපි දන්නවා. නමුත් ප්‍රමාණවත් ආරක්ෂාවක් ලැබුණේ නැහැ,” යනුවෙන් අසල්වැසියෙක් සඳහන් කළේය.
Post a Comment