නුගේගොඩ ප්‍රදේශයේ පිහිටි කීබල් කොලේජ් ජාත්‍යන්තර පාසලේ අධ්‍යාපනය ලබමින් සිටි පස් හැවිරිදි සිසුවෙකු, පාසල මගින් සංවිධානය කරන ලද පිහිනුම් පුහුණු සැසියක් අතරතුරදී නුගේගොඩ පිහිනුම් තටාකයක දියේ ගිලීමෙන් ඊයේ (08) ජීවිතක්ෂයට පත්ව ඇත. මෙලෙස අවාසනාවන්ත ලෙස මියගොස් ඇත්තේ නුගේගොඩ, තලපත්පිටිය ප්‍රදේශයේ පදිංචිව සිටි නෙතුර වික්‍රම හේරත් නම් දරුවෙකි.
පවුලේ බාලයා වන ඔහුට තවත් වැඩිමහල් සහෝදරයන් දෙදෙනෙකු සිටින බව පොලිසිය පවසයි.
සිද්ධිය වන අවස්ථාවේදී, අදාළ ජාත්‍යන්තර පාසලේ සිසුන් 30 දෙනෙකු පමණ ගුරුවරුන් කිහිප දෙනෙකුගේ අධීක්ෂණය යටතේ නුගේගොඩ, ස්ටැන්ලි තිලකරත්න මාවතේ පිහිටි ‘සන්හිඳ ලෙෂර් සෙන්ටර්’ හි පිහිනුම් තටාකය වෙත පුහුණුවීම් සඳහා ගොස් තිබූ බව පොලිස් විමර්ශන මගින් අනාවරණය වී තිබේ. පිහිනුම් පුහුණුව අතරතුර දියේ ගිලී අසාධ්‍ය තත්ත්වයේ සිටි මෙම සිසුවා කළුබෝවිල ශික්ෂණ රෝහලට ඇතුළත් කිරීමෙන් අනතුරුව මියගොස් ඇති බව මිරිහාන පොලිසිය තහවුරු කළේය.
මෙම මරණය සම්බන්ධයෙන් සම්පූර්ණ වගකීම පාසල් බලධාරීන් විසින් දැරිය යුතු බවට මියගිය දරුවාගේ පියා වන ප්‍රදීප් හේරත් මහතා චෝදනා කරයි. තම දරුවා පාසල වෙත භාර දුන්නේත්, පිහිනුම් පුහුණුව සඳහා යොමු කළේත් පාසල කෙරෙහි තැබූ පූර්ණ විශ්වාසය මත බව ඔහු අවධාරණය කළේය. සාමාන්‍යයෙන් පුහුණුකරුවන් දෙදෙනෙකු යොදවන පිහිනුම් සැසිය සඳහා සිද්ධිය වූ දිනයේ යොදවා තිබී ඇත්තේ එක් පුහුණුකරුවෙකු පමණක් බවත්, ඒ නිත්‍ය පුහුණුකරු නොවන බවත් හෙතෙම කියා සිටියේය.
තම දරුවාට පිහිනීම සම්බන්ධයෙන් කිසිදු පූර්ව දැනුමක් නොතිබූ බැවින් ඔහුව ළමා පිහිනුම් තටාකයට යොමු කළ යුතුව තිබුණද, ගැඹුරු පිහිනුම් තටාකයට යොමු කර ඇති බවටද පියා චෝදනා කරයි. දරුවා දියේ පාවෙමින් සිටිනු දැක ඒ බව දැනුම් දී ඇත්තේ එම ස්ථානයේ සිටි සේවකයෙකු බවත්, පසුව තම දියණිය සහ පුහුණුකරු එක්ව දරුවා ගොඩට ගෙන ඇති බවත් ඔහු පැවසීය. රෝහලට රැගෙන යන විට දරුවාට සිහිය තිබූ බව පුහුණුකරු පැවසුවද, එම අවස්ථාවේදීත් ඔහු සිහිසුන්ව සිටි බව එම ස්ථානයේ සිටි තම දියණිය පැවසූ බවත්, දරුවා රෝහලට රැගෙන ඒමට මිනිත්තු 20 කට පමණ පෙර මියගොස් සිටි බව රෝහලෙන් දැන්වූ බවත් ප්‍රදීප් හේරත් මහතා වැඩිදුරටත් සඳහන් කළේය.
මියගිය දරුවාගේ දේහය පශ්චාත් මරණ පරීක්ෂණය සඳහා කළුබෝවිල ශික්ෂණ රෝහලේ තැන්පත් කර තිබුණි. පසුගිය සතියක කාලය තුළ පිහිනුම් තටාකවල සිදුවූ මරණයක් වාර්තා වූ තෙවැනි අවස්ථාව මෙය බව පොලිසිය පෙන්වා දෙයි. නුගේගොඩ කොට්ඨාස භාර ජ්‍යෙෂ්ඨ පොලිස් අධිකාරී මංගල දෙහිදෙණිය මහතාගේ උපදෙස් මත මිරිහාන පොලිසිය සිද්ධිය සම්බන්ධයෙන් වැඩිදුර විමර්ශන සිදුකරනු ලබයි.
Gossip Lanka News
Post a Comment